Gaguritan Babad Pande 1

SASTRA ARTOS GAGURITAN

“BABAD PANDE”

OLIH: I KADEK SUPARTA

KEDONGANAN – KUTA

Januari 2013

KAARTOS SAKING:

GAGURITAN BABAD PANDE

OLIH: I KETUT RUMA

JASRI - KARANGASEM

MAHA SEMAYA WARGA PANDE KARANGASEM

April 2007

OM AWIGHNAM ASTU NAMO SIDDHAM

Om Vedatmana ya vidmahe

Hiranya garbha ya dhimahi

Tanno Brahma prachodayat

Om Saraswati namostubhyam

Varade kama rupini

Sidharamba karisyami

Sidhir bhavantume sadha

Om Swastyastu,

Sangkaning rasa bakti, purun prasangga tiang ngaturang Sastra Artos Gaguritan Babad Pande puniki majeng ring Ida Dane sinareng sami, mustikannyane para semeton Warga Pande ring sajebag Bali. Majeng ring Bapak Ketut Ruma, titiang nunas kaledangan riantukan Sastra Artos Gaguritan puniki kaartos saking Buku Babad Pande kakawian druwene. Suksma aturang titiang majeng ring Jro Mangku Mupu lanang istri saking Jroan Gunaksa - Klungkung, riantukan sangkaning pawarah-warah Dane, titiang ngawitin makarya Sastra Artos puniki.

Inggih asapunika pidaging panyembrama titiang. Tan lali titiang maragayan dahat wimuda, kalintang tambet, nunas agung pangampura indik kirang langkung daging pangartosan titiang.

Om Shanti Shanti Shanti Om

                                                                                                Kedonganan, 20 Januari 2013

                                                                                                Pangartos,

                                                                                                I Kadek Suparta

                                                                                               

                                                                                                                                FB: kd.suparta@gmail.com

OM AWIGHNAM ASTU NAMO SIDDHAM

PUPUH SINOM

1. Puja panganjali aturang titiang… “Om Swastyastu”

Ring bhuh padan Sang Hyang Aji Saraswati

Ida wantah pamurtian jnana kawruhan

Sane nyunarin sarwa prani, sakancan sane maurip ring mercapada

Kawentenan titiang boya nenten sios wantah mangastuti

Bhuh pada Ida Bhatara kasiwi kaasti

Tur saha linggihang titiang

Ring sapamargin titiang mupuh magurit

Mangda suweca kadi linggih Ida mapaica teja, sekadi Sang Hyang Raditya lan Chandra

2. Dumogi suweca Ida mapaica wara nugraha

Ring sikian titiang sane wimuda, kalintang tambet lan nista

Sane kari maragayan mala lan letuh

Pinaka tirta panglukatan Sanjiwani, waluya pamrayascita

Ngaresikin mala roga wighna ring budi lan manah

Sakluiring sane mawasta Sad Ripu, nenem meseh tan sios

Tri Mala utawi tatiga kaletehan, lan Panca Indria utawi lalima pangarasaning angga sarira

Rajah lan tamah mamiruda, rajah wantah nyapa kadi aku, tamah wantah rasa lesu ngekoh

Makasami ngaliputin pikayun, wasta metu samsara ring kahuripan