Rg Veda Mandala I Sukta 1

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

APRIL 2014

SUKTA 1

I.1.1    

agním īḷe puróhitaṃ

yajñásya devám r̥tvíjam

hótāraṃ ratnadhā́tamam

I.1.2    

agníḥ pū́rvebhir ŕ̥ṣibhir

ī́ḍiyo nū́tanair utá

sá devā́m̐ éhá vakṣati

I.1.3    

agnínā rayím aśnavat

póṣam evá divé-dive

yaśásaṃ vīrávattamam

I.1.4    

ágne yáṃ yajñám adhvaráṃ

viśvátaḥ paribhū́r ási

sá íd devéṣu gachati

I.1.5    

agnír hótā kavíkratuḥ

satyáś citráśravastamaḥ

devó devébhir ā́ gamat

I.1.6    

yád aṅgá dāśúṣe tuvám

ágne bhadráṃ kariṣyási

távét tát satyám aṅgiraḥ

I.1.7    

úpa tvāgne divé-dive

dóṣāvastar dhiyā́ vayám

námo bháranta émasi

I.1.8   

rā́jantam adhvarā́ṇãṃ

gopā́m r̥tásya dī́divim

várdhamānaṃ suvé dáme

I.1.9    

sá naḥ pitéva sūnáve

ágne sūpāyanó bhava

sácasvā naḥ suastáye