Rg Veda Mandala I Sukta 12

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

APRIL 2014

SUKTA 12

I.12.1    

agníṃ dūtáṃ vr̥ṇīmahe

hótāraṃ viśvávedasam

asyá yajñásya sukrátum

I.12.2    

agním-agniṃ hávīmabhiḥ

sádā havanta viśpátim

havyavā́ham purupriyám

I.12.3   

ágne devā́m̐ ihā́ vaha

jajñānó vr̥ktábarhiṣe

ási hótā na ī́ḍiyaḥ

I.12.4    

tā́m̐ uśató ví bodhaya

yád agne yā́si dūtíyam

devaír ā́ satsi barhíṣi

I.12.5    

ghŕ̥tāhavana dīdivaḥ

práti ṣma ríṣato daha

ágne tuváṃ rakṣasvínaḥ

I.12.6    

agnínāgníḥ sám idhyate

kavír gr̥hápatir yúvā

havyavā́ḍ juhúvāsiyaḥ

I.12.7    

kavím agním úpa stuhi

satyádharmāṇam adhvaré

devám amīvacā́tanam

I.12.8    

yás tvā́m agne havíṣpatir

dūtáṃ deva saparyáti

tásya sma prāvitā́ bhava

I.12.9    

yó agníṃ devávītaye

havíṣmām̐ āvívāsati

tásmai pavāka mr̥̄ḷaya

I.12.10    

sá naḥ pavāka dīdivo

ágne devā́m̐ ihā́ vaha

úpa yajñáṃ havíś ca naḥ

I.12.11    

sá na stávāna ā́ bhara

gāyatréṇa návīyasā

rayíṃ vīrávatīm íṣam

I.12.12    

ágne śukréṇa śocíṣā

víśvābhir deváhūtibhiḥ

imáṃ stómaṃ juṣasva naḥ