Rg Veda Mandala I Sukta 19

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

April 2015

SUKTA 19

I.19.1    

práti tyáṃ cā́rum adhvaráṃ

gopīthā́ya prá hūyase

marúdbhir agna ā́ gahi

I.19.2    

nahí devó ná mártiyo

mahás táva krátum paráḥ

marúdbhir agna ā́ gahi

I.19.3    

yé mahó rájaso vidúr

víśve devā́so adrúhaḥ

marúdbhir agna ā́ gahi

I.19.4    

yá ugrā́ arkám ānr̥cúr

ánādhr̥ṣṭāsa ójasā

1marúdbhir agna ā́ gahi

I.19.5    

yé śubhrā́ ghorávarpasaḥ

sukṣatrā́so riśā́dasaḥ

marúdbhir agna ā́ gahi

I.19.6    

yé nā́kasyā́dhi rocané

diví devā́sa ā́sate

marúdbhir agna ā́ gahi

I.19.7    

yá īṅkháyanti párvatān

tiráḥ samudrám arṇavám

marúdbhir agna ā́ gahi

I.19.8    

ā́ yé tanvánti raśmíbhis

tiráḥ samudrám ójasā

marúdbhir agna ā́ gahi

I.19.9    

abhí tvā pūrvápītaye

sr̥jā́mi somiyám mádhu

marúdbhir agna ā́ gahi