Rg Veda Mandala I Sukta 27

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

April 2015

SUKTA 27

I.27.1    

áśvaṃ ná tvā vā́ravantaṃ

vandádhyā agníṃ námobhiḥ

samrā́jantam adhvarā́ṇām

I.27.2    

sá ghā naḥ sūnúḥ śávasā

pr̥thúpragāmā suśévaḥ

mīḍhvā́m̐ asmā́kam babhūyāt

I.27.3    

sá no dūrā́c ca āsā́c ca

ní mártiyãd aghāyóḥ

pāhí sádam íd viśvā́yuḥ

I.27.4    

imám ū ṣú tvám asmā́kaṃ

saníṃ gāyatráṃ návyāṃsam

ágne devéṣu prá vocaḥ

I.27.5    

ā́ no bhaja paraméṣu

ā́ vā́jeṣu madhyaméṣu

śíkṣā vásvo ántamasya

I.27.6    

vibhaktā́si citrabhāno

síndhor ūrmā́ upāká ā́

sadyó dāśúṣe kṣarasi

I.27.7    

yám agne pr̥tsú mártiyam

ávā vā́jeṣu yáṃ junā́ḥ

sá yántā śáśvatīr íṣaḥ

I.27.8    

nákir asya sahantiya

parietā́ káyasya cit

vā́jo asti śravā́yiyaḥ

I.27.9    

sá vā́jaṃ viśvácarṣaṇir

árvadbhir astu tárutā

víprebhir astu sánitā

I.27.10    

járābodha tád viviḍḍhi

viśé-viśe yajñíyāya

stómaṃ rudrā́ya dŕ̥śīkam

I.27.11    

sá no mahā́m̐ animānó

dhūmáketuḥ puruścandráḥ

dhiyé vā́jāya hinvatu

I.27.12    

sá revā́m̐ iva viśpátir

daívyaḥ ketúḥ śr̥ṇotu naḥ

ukthaír agnír br̥hádbhānuḥ

I.27.13    

námo mahádbhyo námo arbhakébhyo

námo yúvabhyo náma āśinébhyaḥ

yájāma devā́n yádi śaknávāma

mā́ jyā́yasaḥ śáṃsam ā́ vr̥kṣi devāḥ