Rg Veda Mandala I Sukta 2

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

APRIL 2014

SUKTA 2

I.2.1    

vā́yav ā́ yāhi darśata

imé sómā áraṃkr̥tāḥ

téṣām pāhi śrudhī́ hávam

I.2.2    

vā́ya ukthébhir jarante

tuvā́m áchā jaritā́raḥ

sutásomā aharvídaḥ

I.2.3    

vā́yo táva prapr̥ñcatī́

dhénā jigāti dāśúṣe

urūcī́ sómapītaye

I.2.4    

índravāyū imé sutā́

úpa práyobhir ā́ gatam

índavo vām uśánti hí

I.2.5    

vā́yav índraś ca cetathaḥ

sutā́nāṃ vājinīvasū

tā́v ā́ yātam úpa dravát

I.2.6    

vā́yav índraś ca sunvatá

ā́ yātam úpa niṣkr̥tám

makṣú itthā́ dhiyā́ narā

I.2.7    

mitráṃ huve pūtádakṣaṃ

váruṇaṃ ca riśā́dasam

dhíyaṃ ghr̥tā́cīṃ sā́dhantā

I.2.8    

r̥téna mitrāvaruṇāv

r̥tāvr̥dhāv r̥taspr̥śā

krátum br̥hántam āśathe°

I.2.9   

kavī́ no mitrā́váruṇā

tuvijātā́ urukṣáyā

dákṣaṃ dadhāte apásam