Rg Veda Mandala I Sukta 10

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

APRIL 2014

SUKTA 10

I.10.1    

gā́yanti tvā gāyatríṇo

árcanti arkám arkíṇaḥ

brahmā́ṇas tvā śatakrata

úd vaṃśám iva yemire

I.10.2    

yát sā́noḥ sā́num ā́ruhad

bhū́ri áspaṣṭa kártuvam

tád índro árthaṃ cetati

yūthéna vr̥ṣṇír ejati

I.10.3    

yukṣvā́ hí keśínā hárī

vŕ̥ṣaṇā kakṣiyaprã́

áthā na indra somapā

girā́m úpaśrutiṃ cara

I.10.4    

éhi stómām̐ abhí svara

abhí gr̥ṇīhi ā́ ruva

bráhma ca no vaso sácā

índra yajñáṃ ca vardhaya

I.10.5    

ukthám índrāya śáṃsiyaṃ

várdhanam puruniṣṣídhe

śakró yáthā sutéṣu ṇo

rāráṇat sakhiyéṣu ca

I.10.6    

tám ít sakhitvá īmahe

táṃ rāyé táṃ suvī́riye

sá śakrá utá naḥ śakad

índro vásu dáyamānaḥ

I.10.7    

suvivŕ̥taṃ sunirájam

índra tvā́dātam íd yáśaḥ

gávām ápa vrajáṃ vr̥dhi

kr̥ṇuṣvá rā́dho adrivaḥ

I.10.8     

nahí tvā ródasī ubhé

r̥ghāyámāṇam ínvataḥ

jéṣaḥ súvarvatīr apáḥ

sáṃ gā́ asmábhya° dhūnuhi

I.10.9    

ā́śrutkarṇa śrudhī́ hávaṃ

nū́ cid dadhiṣva me gíraḥ

índra stómam imám máma

kr̥ṣvā́ yujáś cid ántaram

I.10.10    

vidmā́ hí tvā vŕ̥ṣantamaṃ

vā́jeṣu havanaśrútam

vŕ̥ṣantamasya hūmaha

ūtíṃ sahasrasā́tamām

I.10.11    

ā́ tū́ na indra kauśika

mandasānáḥ sutám piba

návyam ā́yuḥ prá sū́ tira

kr̥dhī́ sahasrasā́m ŕ̥ṣim

I.10.12    

pári tvā girvaṇo gíra

imā́ bhavantu viśvátaḥ

vr̥ddhā́yum ánu vŕ̥ddhayo

júṣṭā bhavantu júṣṭayaḥ