Prosa Aji Palayon 1

KAKAWIN

“AJI PALAYON“

MIWAH TÉGÉS IPUN

MANGGE RIKALA PITRA YADNYA

KASALIN LATIN OLIH:

I Kadek Suparta

SEKEHA SANTHI “GITA SWASTIKA”

BANJAR KETAPANG

DESA ADAT KEDONGANAN

April 2015

Om Awighnam Astu Nama Siddham

Saparaning wara nara, ngawe kasukan hitaning para, mānira nara para tucca, juga amatih para lwir ika. Anging dūran manira kawasana, kadi paraning paramārtheka, mānireki atur paranjangan, maha dhmit uni akweh.

Yening bawosang indik tatujon sang sane maragayan utama utawi pradnyan punika, nentén ja wentén sios wantah pacang mangardinin karahajéngan i panjak lan para jana maka sami. Sakawenténan titiange wantah janma kalintang tuna, tambét, dahat wimuda. Talér satata mautsaha manginutin sang kadi maragayan utama lan luwih punika. Sakewantén doh para antuk titiang pacang prasida, nginutin sakadi pamargin sang maragayan pradnyan. Yening nirgamayang, kawenténan titiange puniki nentén bina sakadi i kédis kapécit, kaliwat cénik awak ipune, nanging liunan munyi.

Ri parhyangan unggwani sang warātma, apan uwus limpad rī kawiratin, angawe tusthaning swagotra, wāndhawa mitra kabeh māgirang. Kāla duskrétā pancendriya, kasarpaning manah uwus linébur, de nikang dasāksarottama, mwang aji kalépasan.

Kacaritayang sane mangkin, ring kahyangan pinaka génah sang atma sane dahat luwih nirmala, dwaning sampun népud ring kasunyatane, sampun panumaya ring galah Idane. Punika sane prasida ngawinang kaledangan pikayunan para saméton-saméton Ida maka sami, taler rawuh ring kakanten sami pada egar garjita ring manah soang-soang. Rikanjékan ical punika i pancendriya, sakancan racun pikayunane sampun prasida kalébur, antuk punika tatwa aksara sucine sane katahnyane adasa, maka miwah aji kalépasan utawi aji Kamoksan.

Tusta cittani sang warātma, kalāning métu sangkeng kurunganya, saking dangu sira kinurungan, anyar mangke kawasā mésat. Katon warong wulunyā iréng, sinongan hyang hima ati suddha, kagiat sang ātma ri ksaneka, de warong iréng jwalita.

Dewa Ratu, dahating ledang punika pikayunan Ida sang atma luwih, ritatkala sampun prasida médal saking guwung nyane, riantukan saking dumun sampun Ida sang atma katéképin, wawu mangkin prasida lépas malésat mawali ka sunya loka. Kacingak antuk Ida wentén barong bulune sélém, karérébin antuk sakancan sayong sane warnan nyane kalintang putih résik. Punika mawinan tangkéjut Ida sang atma, nanging wantah ajébosan, antuk kawenténan i barong sélém sane ngalemlem ring ajéng arép Ida.

                                     

          Aduhuna udhāni sira mwah, anggeka warong ngakarā katon, mangsé sang warātma wawang, amaréki mahā kurunganya. Sangasih amrih angariharih, ri asihnya ri sang kasiasih, lingnya manda mredu alindi, kadhawuhakén ring mahā kurunganya.   

Risampune punika, mawantun malih eling Ida sang atma, paukudanya marupa barong sane ngéndih kacingak, saha rigélis sang atma luwih mangarépang kawenténan baronge punika, manampékin sang sane pinaka guwung nyane riyin. Sang sane maraga sayang misaratang ngarumrum, sāntukan sayang nyane ring sang sane karumrum, saha ngawétuang pari atur sane alus tur dabdab alon, katibanang ring barong punika sane nenten ja wentén sios wantah guwung nyane. // o //