“ṚG VEDA”
MANDALA I
DIEDIT OLEH: I KADEK SUPARTA
KEDONGANAN – KUTA
|
April 2015
SUKTA 24
I.24.1
kásya nūnáṃ katamásyāmŕ̥tānām
mánāmahe cā́ru devásya nā́ma
kó no mahyā́ áditaye púnar dāt
pitáraṃ ca dr̥śéyam mātáraṃ ca
I.24.2
agnér vayám prathamásyāmŕ̥tānām
mánāmahe cā́ru devásya nā́ma
sá no mahyā́ áditaye púnar dāt
pitáraṃ ca dr̥śéyam mātáraṃ ca
I.24.3
abhí tvā deva savitar
ī́śānaṃ vā́riyāṇãm
sádāvan bhāgám īmahe
I.24.4
yáś cid dhí ta itthā́ bhágaḥ
śaśamānáḥ purā́ nidáḥ
adveṣó hástayor dadhé
I.24.5
bhágabhaktasya te vayám
úd aśema távā́vasā
mūrdhā́naṃ rāyá ārábhe
I.24.6
nahí te kṣatráṃ ná sáho ná manyúṃ
váyaś canā́mī́ patáyanta āpúḥ
némā́ ā́po animiṣáṃ cárantīr
ná yé vā́tasya praminánti ábhvam
I.24.7
abudhné rā́jā váruṇo vánasya
ūrdhváṃ stū́paṃ dadate pūtádakṣaḥ
nīcī́nā sthur upári budhná eṣām
asmé antár níhitāḥ ketávaḥ syuḥ
I.24.8
urúṃ hí rā́jā váruṇaś cakā́ra
sū́ryāya pánthām ánuetavā́ u
apáde pā́dā prátidhātave 'kar
utā́pavaktā́ hr̥dayāvídhaś cit
I.24.9
śatáṃ te rājan bhiṣájaḥ sahásram
urvī́ gabhīrā́ sumatíṣ ṭe astu
bā́dhasva dūré nírr̥tim parācaíḥ
kr̥táṃ cid énaḥ prá mumugdhi asmát
I.24.10
amī́ yá ŕ̥kṣā níhitāsa uccā́
náktaṃ dádr̥śre kúha cid díveyuḥ
ádabdhāni váruṇasya vratā́ni
vicā́kaśac candrámā náktam eti
I.24.11
tát tvā yāmi bráhmaṇā vándamānas
tád ā́ śāste yájamāno havírbhiḥ
áheḷamāno varuṇehá bodhi
úruśaṃsa mā́ na ā́yuḥ prá moṣīḥ
I.24.12
tád ín náktaṃ tád dívā máhyam āhus
tád ayáṃ kéto hr̥dá ā́ ví caṣṭe
śúnaḥśépo yám áhuvad gr̥bhītáḥ
só asmā́n rā́jā váruṇo mumoktu
I.24.13
śúnaḥśépo hí áhuvad gr̥bhītás
triṣú ādityáṃ drupadéṣu baddháḥ
ávainaṃ rā́jā váruṇaḥ sasr̥jyād
vidvā́m̐ ádabdho ví mumoktu pā́śān
I.24.14
áva te héḷo varuṇa námobhir
áva yajñébhir īmahe havírbhiḥ
kṣáyann asmábhyam asura pracetā
rā́jann énāṃsi śiśrathaḥ kr̥tā́ni
I.24.15
úd uttamáṃ varuṇa pā́śam asmád
ávādhamáṃ ví madhyamáṃ śrathāya
áthā vayám āditiya vraté táva
ánāgaso áditaye siyāma
No comments:
Post a Comment