Rg Veda Mandala I Sukta 25

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

April 2015

SUKTA 25

I.25.1    

yác cid dhí te víśo yathā

prá deva varuṇa vratám

minīmási dyávi-dyavi

I.25.2   

mā́ no vadhā́ya hatnáve

jihīḷānásya rīradhaḥ

mā́ hr̥ṇānásya manyáve

I.25.3    

ví mr̥̄ḷīkā́ya te máno

rathī́r áśvaṃ ná sáṃditam

gīrbhír varuṇa sīmahi

I.25.4    

párā hí me vímanyavaḥ

pátanti vásyaïṣṭaye

váyo ná vasatī́r úpa

I.25.5    

kadā́ kṣatraśríyaṃ náram

ā́ váruṇaṃ karāmahe

mr̥̄ḷīkā́yorucákṣasam

I.25.6    

tád ít samānám āśate°

vénantā ná prá yuchataḥ

dhr̥távratāya dāśúṣe

  

I.25.7    

védā yó vīnã́m padám

antárikṣeṇa pátatām

véda nāváḥ samudríyaḥ

I.25.8    

véda māsó dhr̥távrato

duvā́daśa prajā́vataḥ

védā yá upajā́yate

I.25.9    

véda vā́tasya vartaním

urór r̥ṣvásya br̥hatáḥ

védā yé adhiā́sate

I.25.10    

ní ṣasāda dhr̥távrato

váruṇaḥ pastíyāsu ā́

sā́mrājiyāya sukrátuḥ

I.25.11    

áto víśvāni ádbhutā

cikitvā́m̐ abhí paśyati

kr̥tā́ni yā́ ca kártuvā

I.25.12    

sá no viśvā́hā sukrátur

ādityáḥ supáthā karat

prá ṇa ā́yūṃṣi tāriṣat

I.25.13    

bíbhrad drāpíṃ hiraṇyáyaṃ

váruṇo vasta nirṇíjam

pári spáśo ní ṣedire

I.25.14    

ná yáṃ dípsanti dipsávo

ná drúhvāṇo jánānãm

ná devám abhímātayaḥ

I.25.15    

utá yó mā́nuṣeṣu ā́

yáśaś cakré ásāmi ā́

asmā́kam udáreṣu ā́

I.25.16    

párā me yanti dhītáyo

gā́vo ná gávyūtīr ánu

ichántīr urucákṣasam

I.25.17    

sáṃ nú vocāvahai púnar

yáto me mádhu ā́bhr̥tam

hóteva kṣádase priyám

I.25.18    

dárśaṃ nú viśvádarśataṃ

dárśaṃ rátham ádhi kṣámi

etā́ juṣata me gíraḥ

I.25.19    

imám me varuṇa śrudhī

hávam adyā́ ca mr̥̄ḷaya

tuvā́m avasyúr ā́ cake

I.25.20    

tuváṃ víśvasya medhira

diváś ca gmáś ca rājasi

sá yā́mani práti śrudhi

I.25.21    

úd uttamám mumugdhi no

ví pā́śam madhyamáṃ cr̥ta

ávādhamā́ni jīváse