Rg Veda Mandala I Sukta 14

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

APRIL 2014

SUKTA 14

I.14.1   

aíbhir agne dúvo gíro

víśvebhiḥ sómapītaye

devébhir yāhi yákṣi ca

I.14.2  

ā́ tvā káṇvā ahūṣata

gr̥ṇánti vipra te dhíyaḥ

devébhir agna ā́ gahi

I.14.3   

indravāyū́ bŕ̥haspátim

mitrā́gním pūṣáṇam bhágam

ādityā́n mā́rutaṃ gaṇám

I.14.4    

prá vo bhriyanta índavo

matsarā́ mādayiṣṇávaḥ

drapsā́ mádhvaś camūṣádaḥ

I.14.5    

ī́ḷate tvā́m avasyávaḥ

káṇvāso vr̥ktábarhiṣaḥ

havíṣmanto araṃkŕ̥taḥ

I.14.6   

ghr̥tápr̥ṣṭhā manoyújo

yé tvā váhanti váhnayaḥ

ā́ devā́n sómapītaye

I.14.7   

tā́n yájatrām̐ r̥tāvŕ̥dho

ágne pátnīvatas kr̥dhi

mádhvaḥ sujihva pāyaya

I.14.8    

yé yájatrā yá ī́ḍiyās

té te pibantu jihváyā

mádhor agne váṣaṭkr̥ti

I.14.9    

ā́kīṃ sū́ryasya rocanā́d

víśvān devā́m̐ uṣarbúdhaḥ

vípro hótehá vakṣati

I.14.10   

víśvebhiḥ somiyám mádhu

ágna índreṇa vāyúnā

píbā mitrásya dhā́mabhiḥ

I.14.11    

tuváṃ hótā mánurhito

ágne yajñéṣu sīdasi

sémáṃ no adhvaráṃ yaja

I.14.12    

yukṣvā́ hí áruṣī ráthe

haríto deva rohítaḥ

tā́bhir devā́m̐ ihā́ vaha