Gaguritan Babad Pande 14

SASTRA ARTOS GAGURITAN

“BABAD PANDE”

OLIH: I KADEK SUPARTA

KEDONGANAN – KUTA

Januari 2013

KAARTOS SAKING:

GAGURITAN BABAD PANDE

OLIH: I KETUT RUMA

JASRI - KARANGASEM

MAHA SEMAYA WARGA PANDE KARANGASEM

April 2007

49. Makarya Parahyangan ring sisi tengen utawi sisi kauh

Kahyangan jagat Penataran Agung sane madaging Padma Tiga ring Besakih

Wantah kadi asapunika sapamadeg Ida Mpu

Inggihan punika Ida Mpu Jaya Saguna

Sane kaiiring antuk swagotra makasami lan putun Ida

Makabehan jeneng alungguh mapasraman ring wawidangan Besakih

PUPUH DANGDANG GULA

50. Nenten kacaritayang Ida Dalem Sri Beda Murti sane ngadeg nata

Iriki ring jagat Bali Raja

Makudang warsa ngalintang, mangkin kagentos masane

Sapangrawuh Kyai Sulung Agung ring jagat Bali

Wantah Dane warih trah Majapahit ring Jawi Dwipa

Okan Ida Mpu Dwijaksara

Rawuh prapti ring jagat Bali puniki

Sangkaning pidabdab winayan Dane Patih Gajah Mada

Sane tatkala punika Ida Dalem Sri Beda Murti

Pinaka Narapati Ratu iriki ring Bali Raja

51. Dane Kyai Sulung Agung rigelis kaadegang pinaka Patih Agung

Antuk Ida Dalem Sri Beda Murti

Maka kalih sareng-sareng jenek malungguh ring Gelgel Puri

Wantah Dane Kriyan Agung Patih Ulung

Gelar Dane Patih sane anyar

Sumatsat masaih sareng bhisekan Ida Dalem Sri Tapo Ulung

Sane nyeneng Nara Ratu ring jagat Bali Raja

Sane dumunan parab Ida Dalem wantah Sri Beda Murti

Saderenge Ida kajaya-jaya abhiseka pinaka Nara Ratu  

52. Taler rikanjekane punika, putun Ida Pandita

Ida Mpu Jaya Saguna

Nenten sios wantah Ida Bang Lurah Kapandean

Kaadegang pinaka Punggawa Agung ring Bali Raja

Sane jenek malungguh lan kasungsung panjak ring wawidangan Tusan

Taler pinaka pangiring utawi pengabih

Olih Dane Kriyan Patih Ulung

Taler kasengguh Arya Bang Lurah Tusan Kapandean

Nyeneng manggala ring wawidangan Dalem Bali

Inggihan punika ngadeg Demung ring wawengkon Tusan