Prosa Aji Palayon 2

Ah uduh mahā rungkingku, sthanangku angaji ring nguni, asramangku kita tāmoli, tān lalyāku ri karunānta. Adyātah kréta samayanya, aku aninggali kita, aywa kita soka mānasa, amoga rīhlém katémua mwah.

“Inggih i dewa guwungan titiange, wantah i dewa pinaka génah titiange malajahang dewek dumun, talér linggih titiange nentén ja wentén tios, nentén ja pacang lali titiang ring kapitrésnan i dewane kapining dewek titiange. Nah, sane mangkin sawireh suba tutug urip titiange, titiang nenten pariwangde pacang ninggalin anake buka i dewa. Sampunang i dewa bangét sungsut ring pikayunana, ngiring tunasang dumadak ja pungkuran katému malih ring mercapadane puniki.”

          Um om sang mahā rāga rāga, muliha kita ri pāwaka, rī bāyu jala mwang prétiwī, ananguna yasa adhi kāra. Métu saking prétiwī kita, rī taru lata umawesha, saking sinwām rwan phalamūla, anusupa kiteng garbha.

“Uduh guwungan titiange anake buka i dewa, sane mangkin lautang mantuk i dewa ring Sang Hyang Panca Maha Bhuta: ring apine, angine, yehe, punika miwah mantuk I dewa ring tanahe. Wénang I dewa nangun yasa kerti sane pagéh. Wus punika médal saking prétiwine i dewa, lantur ring sakancan bunbune manusup, asapunika talér saking muncuk sakancan don, buah-buahan, miwah sakawenténan akahe, saking drika manyusup i dewa ka garba sang ibu.

          Saking Udarā ta maring angga, anadyā mrétan jīwanī, asmara bhāganing angga, angdeya sampūrnaning bāyu. Kaleka amogana kita, katémua lawan aku mwah, ah ah uduh sang mahā rungkingku, aku aninggali kita mangke.

Ngawit saking garba sang ibu, manyusup I dewa ka angga sarirane, matémahan manados tirta amréta sane utama, ngaran tirta Sanjiwani, saha matunggilan irika ring angga sarirane, maka sami matémahan manados kabecikan bayune. Rikanjékan punika dumadak ja i dewa, prasida katému saréng dewek titiange puniki malih. Uduh uduh guwungan titiange sane Utama anake buka I dewa, titiang jagi sada ri gelis pacang ninggalin kawenténan i dewane sane mangkin.”

                            

          Ri palangkā samī paning laywan, katinghal de sang atmika, srédham sopacarā nirmala, uwus patata ardha somya. Bubūr pirata kusuma ura, kundha séga tépéng panjang ilang, séga wingkisan pangangkat-angkat, iwak itik surā pajegan.

Kalanturang carita sane mangkin, di palangkane sane nampék ring samping layon, kacingak antuk Ida sang atma, sampun pada srégép saupakara suci nirmala, maka sami sampun katragayang becik pisan kacingak matata luwih. Minakadi sapirantining: bubuh pirata miwah sékar ura, pasépan nasi tépéng panjang ilang, nasi takil miwah pangangkat-angkat, ulam bebek miwah tuak pajégan. Sampun sayaga cumawis maka sami irika ring bale palangkane.

                                               

Tarpana agung sawadhah, tarpana alit catur limas, sangkép kabeh ségéhanya, sopacaraning wang antarlīna. Parésikan we kumkuman, cumadhang kabeh ri parāngka, wang akweh gata – agata, makidhupuh mwang asila.

Siosan ring punika, sakancan tarpana agung asiki, tarpana alit catur limas, talér sampun jangkép maka sami saha ségéhan nyane soang-soang, sami pinaka sopakaraning anake sane seda. Cumawis talér tarpana parésikan miwah yeh kumkuman, sampun srégép sami cumadang ring palangkane. Dewa Ratu, akeh anake sane prasida téka mulih irika, sami pada madélokan. Sane istri-istri pada matimpuh, miwah sane lanang-lanang pada masila //o//