Rg Veda Mandala I Sukta 26

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

April 2015

SUKTA 26

I.26.1    

vásiṣvā hí miyedhiya

vástrāṇi ūrjãm pate

sémáṃ no adhvaráṃ yaja

I.26.2    

ní no hótā váreṇiyaḥ

sádā yaviṣṭha mánmabhiḥ

ágne divítmatā vácaḥ

I.26.3    

ā́ hí ṣmā sūnáve pitā́

āpír yájati āpáye

sákhā sákhye váreṇiyaḥ

I.26.4    

ā́ no barhī́ riśā́daso

váruṇo mitró aryamā́

sī́dantu mánuṣo yathā

I.26.5    

pū́rviya hotar asyá no

mándasva sakhiyásya ca

imā́ u ṣú śrudhī gíraḥ

I.26.6    

yác cid dhí śáśvatā tánā

deváṃ-devaṃ yájāmahe

tuvé íd dhūyate havíḥ

I.26.7    

priyó no astu viśpátir

hótā mandró váreṇiyaḥ

priyā́ḥ suagnáyo vayám

I.26.8    

suagnáyo hí vā́riyaṃ

devā́so dadhiré ca naḥ

suagnáyo manāmahe

I.26.9    

áthā na ubháyeṣãm

ámr̥ta mártiyānãm

mitháḥ santu práśastayaḥ

I.26.10    

víśvebhir agne agníbhir

imáṃ yajñám idáṃ vácaḥ

cáno dhāḥ sahaso yaho