Rg Veda Mandala I Sukta 13

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

APRIL 2014

SUKTA 13

I.13.1   

súsamiddho na ā́ vaha

devā́m̐ agne havíṣmate

hótaḥ pavāka yákṣi ca

I.13.2    

mádhumantaṃ tanūnapād

yajñáṃ devéṣu naḥ kave

adyā́ kr̥ṇuhi vītáye

I.13.3    

nárāśáṃsam ihá priyám

asmín yajñá úpa hvaye

mádhujihvaṃ haviṣkŕ̥tam

I.13.4    

ágne sukhátame ráthe

devā́m̐ īḷitá ā́ vaha

ási hótā mánurhitaḥ

I.13.5    

str̥ṇītá barhír ānuṣág

ghr̥tápr̥ṣṭham manīṣiṇaḥ

yátrāmŕ̥tasya cákṣaṇam

I.13.6    

ví śrayantām r̥tāvŕ̥dho

dvā́ro devī́r asaścátaḥ

adyā́ nūnáṃ ca yáṣṭave

I.13.7   

náktoṣā́sā supéśasā

asmín yajñá úpa hvaye

idáṃ no barhír āsáde

I.13.8    

tā́ sujihvā́ úpa hvaye

hótārā daíviyā kavī́

yajñáṃ no yakṣatām imám

I.13.9    

íḷā sárasvatī mahī́

tisró devī́r mayobhúvaḥ

barhíḥ sīdantu asrídhaḥ

I.13.10   

ihá tváṣṭāram agriyáṃ

viśvárūpam úpa hvaye

asmā́kam astu kévalaḥ

I.13.11    

áva sr̥jā vanaspate

déva devébhiyo havíḥ

prá dātúr astu cétanam

I.13.12    

svā́hā yajñáṃ kr̥ṇotana

índrāya yájvano gr̥hé

tátra devā́m̐ úpa hvaye