Rg Veda Mandala I Sukta 16

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

April 2015

SUKTA 16

I.16.1    

ā́ tvā vahantu hárayo

vŕ̥ṣaṇaṃ sómapītaye

índra tvā sū́racakṣasaḥ

I.16.2    

imā́ dhānā́ ghr̥tasnúvo

hárī ihópa vakṣataḥ

índraṃ sukhátame ráthe

I.16.3    

índram prātár havāmaha

índram prayatí adhvaré

índraṃ sómasya pītáye

I.16.4    

úpa naḥ sutám ā́ gahi

háribhir indra keśíbhiḥ

suté hí tvā hávāmahe

I.16.5    

sémáṃ na stómam ā́ gahi

úpedáṃ sávanaṃ sutám

gauró ná tr̥ṣitáḥ piba

I.16.6   

imé sómāsa índavaḥ

sutā́so ádhi barhíṣi

tā́m̐ indra sáhase piba

I.16.7    

ayáṃ te stómo agriyó

hr̥dispŕ̥g astu śáṃtamaḥ

áthā sómaṃ sutám piba

I.16.8    

víśvam ít sávanaṃ sutám

índro mádāya gachati

vr̥trahā́ sómapītaye

I.16.9    

sémáṃ naḥ kā́mam ā́ pr̥ṇa

góbhir áśvaiḥ śatakrato

stávāma tvā suādhíyaḥ