Rg Veda Mandala I Sukta 8

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

APRIL 2014

SUKTA 8

I.8.1    

ā́ indra sānasíṃ rayíṃ

sajítvānaṃ sadāsáham

várṣiṣṭham ūtáye bhara

I.8.2    

ní yéna muṣṭihatyáyā

ní vr̥trā́ ruṇádhāmahai

tuvótāso ní árvatā

I.8.3    

índra tvótāsa ā́ vayáṃ

vájraṃ ghanā́ dadīmahi

jáyema sáṃ yudhí spŕ̥dhaḥ

I.8.4     

vayáṃ śū́rebhir ástr̥bhir

índra tváyā yujā́ vayám

sāsahyā́ma pr̥tanyatáḥ

I.8.5    

mahā́m̐ índraḥ paráś ca nú

mahitvám astu vajríṇe

diyaúr ná prathinā́ śávaḥ

I.8.6    

samohé vā yá ā́śata

náras tokásya sánitau

víprāso vā dhiyāyávaḥ

I.8.7    

yáḥ kukṣíḥ somapā́tamaḥ

samudrá iva pínvate

urvī́r ā́po ná kākúdaḥ

I.8.8    

evā́ hí asya sūnŕ̥tā

virapśī́ gómatī mahī́

pakvā́ śā́khā ná dāśúṣe

I.8.9    

evā́ hí te víbhūtaya

ūtáya indra mā́vate

sadyáś cit sánti dāśúṣe

I.8.10    

evā́ hí asya kā́miyā

stóma uktháṃ ca śáṃsiyā

índrāya sómapītaye