Gaguritan Babad Pande 5

SASTRA ARTOS GAGURITAN

“BABAD PANDE”

OLIH: I KADEK SUPARTA

KEDONGANAN – KUTA

Januari 2013

KAARTOS SAKING:

GAGURITAN BABAD PANDE

OLIH: I KETUT RUMA

JASRI - KARANGASEM

MAHA SEMAYA WARGA PANDE KARANGASEM

April 2007

13. Salanturnyane, kacaritayang pamargin Ida Mpu Semeru

Taler lunga prapta ring Bali Dwipa

Ring rahina Sukra Kliwon wuku Pujut

Ring warsa Caka sanga salikur kadi sapangrawuh Ida

Saha lantur makarya Parahyangan ring wawidangan Besakih

Nenten suwe malih, lantur prapta ring Bali Ida Mpu Gana

Ring rahina Soma Kliwon wuku Kuningan

Ring Caka warsa sanga kalih likur

Lantur makarya Parahyangan ring wawidangan jagat Gelgel

14. Sane mangkin kalanturang carita parindikan Ida Mpu Kuturan

Taler lunga prapta ring Bali Dwipa

Wantah tatujon Ida ring wetan utawi nganginang

Irika ring wawidangan Padang Ida Pandita jenek malinggih

Ring Caka warsa sanga tiga likur

Ring rahina Sukra Kliwon wuku Pahang

Wantah kalintang dibya wikan Ida Pandita ring sahananing sastra Aji

Saha Ida sane mapaica tuntunan maagama ring jagate

15. Kawinursita mangkin kawentenan Ida Mpu Baradah

Jenek malinggih ring Lemah Tulis

Sane kantun ring wawidangan Pajarakan

Irika ring Jawi Dwipa sisi kangin wantah genahnyane

Yaning manut sakadi pidartan babad lalintihan

Wantah Ida Mpu Baradah sane kabawosang

Ngawetuang utawi nedunang para wangsa Brahmana

Brahmana Siwa lan Budha ring jagat Bali

Ritatkala riin Ida kalinggihang pinaka Bhagawanta Ida Dalem

PUPUH GINADA

16. Inggih, punggelang riin saparidaging carita

Sane lantur pacang kapidartayang mangkin

Nenten wenten sios wantah okan Ida Mpu Wita Darma

Sunu sane pinih alit, oka sane kaping rwa

Sane maparab Mpu Dwijendra Raja Kerta

Wastu sampun madrebe stri utami, lan nenten asuwe masunu tigang diri