Rg Veda Mandala I Sukta 5

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

APRIL 2014 

SUKTA 5

I.5.1    

ā́ tu étā ní ṣīdata

índram abhí prá gāyata

sákhāya stómavāhasaḥ

I.5.2    

purūtámam purūṇã́m

ī́śānaṃ vā́riyāṇãm

índraṃ sóme sácā suté

I.5.3    

sá ghā no yóga ā́ bhuvat

sá rāyé sá púraṃdhiyām

gámad vā́jebhir ā́ sá naḥ

I.5.4    

yásya saṃsthé ná vr̥ṇváte

hárī samátsu śátravaḥ

tásmā índrāya gāyata

I.5.5    

sutapā́vne sutā́ imé

śúcayo yanti vītáye

sómāso dádhiāśiraḥ

I.5.6    

tuváṃ sutásya pītáye

sadyó vr̥ddhó ajāyathāḥ

índra jyaíṣṭhyāya sukrato

I.5.7   

ā́ tvā viśantu āśávaḥ

sómāsa indra girvaṇaḥ

śáṃ te santu prácetase

I.5.8    

tuvā́ṃ stómā avīvr̥dhan

tuvā́m ukthā́ śatakrato

tuvā́ṃ vardhantu no gíraḥ

I.5.9    

ákṣitotiḥ saned imáṃ

vā́jam índraḥ sahasríṇam

yásmin víśvāni paúṃsiyā

 I.5.10    

mā́ no mártā abhí druhan

tanū́nām indra girvaṇaḥ

ī́śāno yavayā vadhám