Rg Veda Mandala I Sukta 23

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

April 2015

SUKTA 23

I.23.1    

tīvrā́ḥ sómāsa ā́ gahi

āśī́rvantaḥ sutā́ imé

vā́yo tā́n prásthitān piba

I.23.2    

ubhā́ devā́ divispŕ̥śā

indravāyū́ havāmahe

asyá sómasya pītáye

I.23.3   

indravāyū́ manojúvā

víprā havanta ūtáye

sahasrākṣā́ dhiyás pátī

I.23.4     

mitráṃ vayáṃ havāmahe

váruṇaṃ sómapītaye

jajñānā́ pūtádakṣasā

I.23.5    

r̥téna yā́v r̥tāvŕ̥dhāv

r̥tásya jyótiṣas pátī

tā́ mitrā́váruṇā huve

I.23.6    

váruṇaḥ prāvitā́ bhuvan

mitró víśvābhir ūtíbhiḥ

káratāṃ naḥ surā́dhasaḥ

I.23.7    

marútvantaṃ havāmaha

índram ā́ sómapītaye

sajū́r gaṇéna tr̥mpatu

I.23.8    

índrajyeṣṭhā márudgaṇā

dévāsaḥ pū́ṣarātayaḥ

víśve máma śrutā hávam

I.23.9    

hatá vr̥tráṃ sudānava

índreṇa sáhasā yujā́

mā́ no duḥśáṃsa īśata

I.23.10    

víśvān devā́n havāmahe

marútaḥ sómapītaye

ugrā́ hí pŕ̥śnimātaraḥ

I.23.11    

jáyatām iva tanyatúr

marútām eti dhr̥ṣṇuyā́

yác chúbhaṃ yāthánā naraḥ

I.23.12    

haskārā́d vidyútas pári

áto jātā́ avantu naḥ

marúto mr̥̄ḷayantu naḥ

I.23.13    

ā́ pūṣañ citrábarhiṣam

ā́ghr̥ṇe dharúṇaṃ diváḥ

ā́jā naṣṭáṃ yáthā paśúm

I.23.14    

pūṣā́ rā́jānam ā́ghr̥ṇir

ápagūḷhaṃ gúhā hitám

ávindac citrábarhiṣam

I.23.15    

utó sá máhyam índubhiḥ

ṣáḍ yuktā́m̐ anuséṣidhat

góbhir yávaṃ ná carkr̥ṣat

I.23.16    

ambáyo yanti ádhvabhir

jāmáyo adhvarīyatā́m

pr̥ñcatī́r mádhunā páyaḥ

I.23.17    

amū́r yā́ úpa sū́riye

yā́bhir vā sū́riyaḥ sahá

tā́ no hinvantu adhvarám

I.23.18    

apó devī́r úpa hvaye

yátra gā́vaḥ píbanti naḥ

síndhubhyaḥ kártuvaṃ havíḥ

I.23.19    

apsú antár amŕ̥tam apsú bheṣajám

apā́m utá práśastaye

dévā bhávata vājínaḥ

I.23.20    

apsú me sómo abravīd

antár víśvāni bheṣajā́

agníṃ ca viśváśambhuvam

ā́paś ca viśvábheṣajīḥ

I.23.21    

ā́paḥ pr̥ṇītá bheṣajáṃ

várūthaṃ tanúve máma

jiyók ca sū́riyaṃ dr̥śé

I.23.22    

idám āpaḥ prá vahata

yát kíṃ ca duritám máyi

yád vāhám abhidudróha

yád vā śepá utā́nr̥tam

I.23.23    

ā́po adyā́nv acāriṣaṃ

rásena sám agasmahi

páyasvān agna ā́ gahi

tám mā sáṃ sr̥ja várcasā

I.23.24    

sám māgne várcasā sr̥ja

sám prajáyā sám ā́yuṣā

vidyúr me asya devã́

índro vidyāt sahá ŕ̥ṣibhiḥ

Rg Veda Mandala I Sukta 22

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

April 2015

SUKTA 22

I.22.1    

prātaryújā ví bodhaya

aśvínāv éhá gachatām

asyá sómasya pītáye

I.22.2    

yā́ suráthā rathī́tama

ubhā́ devā́ divispŕ̥śā

aśvínā tā́ havāmahe

I.22.3    

yā́ vāṃ káśā mádhumatī

áśvinā sūnŕ̥tāvatī

táyā yajñám mimikṣatam

I.22.4    

nahí vām ásti dūraké

yátrā ráthena gáchathaḥ

áśvinā somíno gr̥hám

I.22.5    

híraṇyapāṇim ūtáye

savitā́ram úpa hvaye

sá céttā devátā padám

I.22.6    

apā́ṃ nápātam ávase

savitā́ram úpa stuhi

tásya vratā́ni uśmasi

I.22.7    

vibhaktā́raṃ havāmahe

vásoś citrásya rā́dhasaḥ

savitā́raṃ nr̥cákṣasam

I.22.8    

sákhāya ā́ ní ṣīdata

savitā́ stómiyo nú naḥ

dā́tā rā́dhāṃsi śumbhati

I.22.9    

ágne pátnīr ihā́ vaha

devā́nām uśatī́r úpa

tváṣṭāraṃ sómapītaye

I.22.10    

ā́ gnā́ agna ihā́vase

hótrāṃ yaviṣṭha bhā́ratīm

várūtrīṃ dhiṣáṇāṃ vaha

I.22.11    

abhí no devī́r ávasā

maháḥ śármaṇā nr̥pátnīḥ

áchinnapatrāḥ sacantām

I.22.12    

ihéndrāṇī́m úpa hvaye

varuṇānī́ṃ suastáye

agnā́yīṃ sómapītaye

I.22.13    

mahī́ dyaúḥ pr̥thivī́ ca na

imáṃ yajñám mimikṣatām

pipr̥tā́ṃ no bhárīmabhiḥ

I.22.14    

táyor íd ghr̥távat páyo

víprā rihanti dhītíbhiḥ

gandharvásya dhruvé padé

I.22.15    

siyonā́ pr̥thivi bhava

anr̥kṣarā́ nivéśanī

yáchā naḥ śárma sapráthaḥ

I.22.16    

áto devā́ avantu no

yáto víṣṇur vicakramé

pr̥thivyā́ḥ saptá dhā́mabhiḥ

I.22.17   

idáṃ víṣṇur ví cakrame

trẽdhā́ ní dadhe padám

sámūḷham asya pāṃsuré

I.22.18    

trī́ṇi padā́ ví cakrame

víṣṇur gopā́ ádābhiyaḥ

áto dhármāṇi dhāráyan

I.22.19    

víṣṇoḥ kármāṇi paśyata

yáto vratā́ni paspaśé

índrasya yújiyaḥ sákhā

I.22.20    

tád víṣṇoḥ paramám padáṃ

sádā paśyanti sūráyaḥ

divī́va cákṣur ā́tatam

I.22.21    

tád víprāso vipanyávo

jāgr̥vā́ṃsaḥ sám indhate

víṣṇor yát paramám padám

Rg Veda Mandala I Sukta 21

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

April 2015

SUKTA 21

I.21.1    

ihéndrāgnī́ úpa hvaye

táyor ít stómam uśmasi

tā́ sómaṃ somapā́tamā

I.21.2    

tā́ yajñéṣu prá śaṃsata

indrāgnī́ śumbhatā naraḥ

tā́ gāyatréṣu gāyata

I.21.3    

tā́ mitrásya práśastaya

indrāgnī́ tā́ havāmahe

somapā́ sómapītaye

I.21.4    

ugrā́ sántā havāmaha

úpedáṃ sávanaṃ sutám

indrāgnī́ éhá gachatām

I.21.5    

tā́ mahā́ntā sádaspátī

índrāgnī rákṣa ubjatam

áprajāḥ santu atríṇaḥ

I.21.6    

téna satyéna jāgr̥tam

ádhi pracetúne padé

índrāgnī śárma yachatam

Rg Veda Mandala I Sukta 20

“ṚG VEDA”

MANDALA I

DIEDIT OLEH: I KADEK SUPARTA

KEDONGANAN – KUTA

April 2015

SUKTA 20

I.20.1    

ayáṃ devā́ya jánmane

stómo víprebhir āsayā́

ákāri ratnadhā́tamaḥ

I.20.2    

yá índrāya vacoyújā

tatakṣúr mánasā hárī

śámībhir yajñám āśata

I.20.3    

tákṣan nā́satiyābhiyām

párijmānaṃ sukháṃ rátham

tákṣan dhenúṃ sabardúghām

I.20.4    

yúvānā pitárā púnaḥ

satyámantrā r̥jūyávaḥ

r̥bhávo viṣṭí akrata

I.20.5    

sáṃ vo mádāso agmata

índreṇa ca marútvatā

ādityébhiś ca rā́jabhiḥ

I.20.6    

utá tyáṃ camasáṃ návaṃ

tváṣṭur devásya níṣkr̥tam

ákarta catúraḥ púnaḥ

I.20.7    

té no rátnāni dhattana

trír ā́ sā́ptāni sunvaté

ékam-ekaṃ suśastíbhiḥ

I.20.8    

ádhārayanta váhnayo

ábhajanta sukr̥tyáyā

bhāgáṃ devéṣu yajñíyam